Ghazal
(Saeed, Sydney)
Kisi dushman na merey yaar ne zinda rakha
Mujh ko ab tak merey pindaar ne zinda rakha
MeiN who aasaaN jisey mojoN ne tawanayi di
MeiN who mushkil jisey manjdhaar ne zinda rakha
Nabz chalti he nahen zarb-e-mohabbat ke seva
Ishq! Mojhko terey aazaar ne zinda rakha
Ek fasana! jisey her peich ne pamaal kiya
Ek kahani! jisey kirdaar ne zinda rakha
Wo tamasha tha jisey ehl-e-nazar bhool gaye
Wo khaber hai jisey akhbaar ne zinda rakha
Ghar kahaN, dasht-e-musafat ke shab-o-roz kahaN
Ek Ta-alluq dar-o-deewar ne zinda rakha
Chorh ker mujhko kaheN ka bhi na chorha usney
Maar ker mujhko merey yaar ne zinda rakha
Saans leta hooN meiN seeney meiN sumander ke Saeed
Kab mujhey sahil-e-beemaar ne zinda rakha
To read the poetry from Saeed's second book please visit
www.saeed.be
